FIFA a confirma cu e Copa Mundial 2026 lo no tin uno, sino tres ceremonia di apertura pa celebra e prome torneo organisa pa tres nacion: Mexico, Merca y Canada. Mientras e lista di artista ta priminti un espectaculo sin precedencia, e inclusion di e cantante Americano Katy Perry a bolbe lanta e candela di un controversia cu tin hopi fanatico dividi.
Mexico ta habri e fiesta na e Coloso di Santa Ursula
E prome celebracion lo tuma luga riba 11 di juni na e legendario Stadio Azteca (renombra como Mexico City Stadium pa e evento). 90 minuut prome cu e wega inaugural entre Mexico y Sur Africa, e publico lo presencia un tributo na e cultura Latino cu artistanan manera:
- J Balvin (Colombia)
- Maná y Alejandro Fernández (Mexico)
- Belinda y Lila Downs (Mexico)
- Los Ángeles Azules (Cumbia Mexicano)
- Tyla (Sur Africa)
Canada y Merca: Musica, cultura y cuestionamento
Riba 12 di juni, e celebracion ta continua na Toronto y Los Angeles. Na Canada, artistanan manera Alanis Morissette y Michael Bublé lo hiba e mando. Sinembargo, e wowo di mundo ta riba e show na Los Angeles, caminda Katy Perry ta e strea principal hunto cu e rapero Future y Lisa (di Blackpink).
E sombra di e controversia: Dicon Katy Perry?
Aunke Katy Perry ta un di e artistanan mas exitoso den historia di pop, su participacion den un evento asina grandi a wordo critica riba rednan social. Hopi hende ta corda e incidente den e programa American Idol na 2018, caminda e cantante a sunchi un participante di 19 aña, Benjamin Glaze, riba su boca sin su permiso.
E tempo ey, e mucha homber a expresa cu e tabata sinti su mes "incomodo" paso e tabata kier a warda pa su prome sunchi tabata cu un persona special. E critica principal ta cu, den un era caminda e tema di consentimiento (consent) ta central, FIFA ta scoge un artista cu tin e tipo di historial aki.
E debate: Criticonan ta cuestiona si e organisacionnan grandi manera FIFA ta pone "rating" y benta di ticket riba e balornan moral y e respet pa espacio personal, ignorando comportacionnan cu den otro contexto lo por a wordo considera inapropia.
E vision di FIFA: "Un solo batimento di curason"
Pa e presidente di FIFA, Gianni Infantino, e ceremonianan aki tin un solo meta: unidad. Infantino a declara cu e seleccion di artistanan ta refleha e diversidad cultural di e tres nacionnan y e poder di musica pa trece hendenan hunto mas aya di fronteranan.
Organisadornan ta priminti cu e fanaticonan lo hunga un "rol activo" den e show y ta pidi tur hende pa yega trempan. Cu casi seis siman di futbol dilanti, e Mundial 2026 ta cuminsa cu hopi expectativa musical, pero tambe cu un publico cu cada bes ta mas vigilante riba e conducta di e streanan cu nan ta idolatra.
Kico abo ta pensa? E talento di un artista mester pisa mas cu su controversianan di pasado ora di scoge ken ta representa un evento mundial?
