E hungadornan di e seleccion di Corsou a pidi formalmente na e federacion di futbol pa Dick Advocaat regresa como bondscoach. Sinembargo, presidente di e federacion, Gilbert Martina, a confirma na De Telegraaf cu Fred Rutten lo ta esun cu lo biaha cu e ekipo pa e Campeonato Mundial (WK).
Deseo di e hungadornan y sponsornan
Dick Advocaat a bandona su puesto na februari ultimo pa motibu di e situacion di salud di su yiu muher. Esaki a sosode apenas algun luna despues cu el a hiba Corsou na un calificacion historico pa e Mundial. Den su luga, Fred Rutten a tuma e mando.
Dos luna pasa a bira conoci cu e salud di e yiu di Advocaat a drecha y cu e tratamento di quimioterapia a duna bon resultado. For di e momento ey, rumornan a cuminsa core cu Advocaat tabata desea di regresa. Segun medionan manera De Telegraaf y AD, e hungadornan di Corsou a organisa un "videocall" diahuebs pa boga pa e regreso di Advocaat, cu kende nan kier a biba e aventura di e Mundial. Tambe algun sponsor importante a expresa nan deseo pa e veterano di Den Haag bolbe.
Decision final di e Bond
A pesar di e presion aki, e federacion a dicidi den un reunion di urgencia pa mantene Rutten den e posicion. Martina a splica:
"E decisionnan di e federacion di futbol ta funda riba hopi mas cu simplemente e deseo di hungador y sponsornan."
E hefe di prensa di Corsou, Kees Jansma, a reacciona cu sorpresa riba e noticia y a indica cu e no tabata na altura di e movecionnan aki. Di otro banda, e medionan ta informa cu Fred Rutten mes ta "na altura di e situacion".
E caminda pa Mundial
Rutten ya a fungi como coach di Corsou durante dos partido di fogueo na maart y, normalmente, lo e ta esun banda di e liña durante e Mundial. Corsou lo debuta den e torneo maximo contra e siguiente ekiponan:
- Alemania: 14 di juni
- Ecuador: 21 di juni
- Costa di Marfil: 25 di juni
Señor Rutten tin planea pa anuncia su seleccion oficial pa e Mundial e dialuna aki mes.
Advocaat y un record potencial
Actualmente, Dick Advocaat ta trahando como consehero di Robin van Persie na Feyenoord. Si e lo a regresa como bondscoach, Advocaat lo a kibra un record mundial cu su 78 aña, birando e coach mas bieu den historia di un Mundial. E record aki actualmente ta den man di e Aleman Otto Rehhagel, kende tabatin 72 aña ora el a dirigi Grecia na e Mundial di 2010.
