E "Reina di Mundialnan," e strea Colombiano Shakira, a bolbe haci historia. Diaranson ultimo, e cantante di 49 aña a duna un bista exclusivo di loke lo ta e himno oficial pa e Copa Mundial di FIFA 2026, titulá "Dai Dai". E anuncio aki a lanta un ola di entusiasmo den e fanaticada di futbol rond mundo, specialmente considerando e laso fuerte cu e artista tin cu e deporte aki.
Un colaboracion vibrante cu Burna Boy
Pa e ocasion aki, Shakira a uni forsa cu e sensacion Nigerian di Afrobeats, Burna Boy. Den un video corto di un minuut post riba Instagram, filma den e iconico stadion Maracanã na Brazil, por scucha e ritmonan contagioso di e cancion nobo. E melodia ta priminti di ta un fusion di e zonido Latino di Shakira cu e influencianan Africano moderno di Burna Boy. E cancion completo lo wordo lansa oficialmente dia 14 di mei.
Shakira: E veterano di FIFA
Esaki no ta prome biaha cu e Barranquillera ta carga e responsabilidad aki. Cu "Dai Dai", Shakira ta marca su di dos cancion oficialmente reconoci como e himno principal di FIFA, sigui despues di e exito global "Waka Waka (This Time for Africa)" na 2010. Sinembargo, su presencia den Mundialnan ta hopi mas extenso:
- Alemania 2006: El a presenta "Hips Don't Lie" den e ceremonia di clausura.
- Sur Africa 2010: El a crea e himno oficial mas bendi den historia di futbol.
- Brazil 2014: El a lansa "La La La (Brazil 2014)" como e di dos tema oficial y a canta na e clausura na Rio de Janeiro.
Un torneo historico
E Mundial 2026 lo ta uno special, no solamente pa e musica, sino pasobra e ta e prome biaha cu e torneo lo conta cu 48 team y lo wordo hunga den tres pais simultaneamente: Estados Unidos, Mexico y Canada. E competencia lo ranca sali dia 11 di juni y lo termina cu e gran final dia 19 di juli.
Pa Shakira, e torneo aki tin un nificacion personal tambe. Su pais natal, Colombia, ya a clasifica y lo ta competiendo pa e trofeo maximo. Despues di su separacion publico di e ex-defensa di Spaña y Barcelona, Gerard Piqué (cu ken e tin dos yiu homber), Shakira a uza su musica como un medio di empoderamento, y "Dai Dai" ta parse di ta e siguiente paso den su regreso triunfal na e tuman di e industria musical.
